Talia dum replicat, comes est sociatus eunti,
Parisius tendens sarcinulasque ferens.
Cui Burnellus «ave» dicto dedit oscula, quaerens
Quis sit et unde satus, quo citus ire velit.
Ille refert, «Siculus ego sum, cupiensque doceri
«Parisius propero; sit via tuta, precor!»
Cui Burnellus ait, «Tria sunt communia nobis,
«Votum, causa, solum; sit via quarta, peto.»
Annuit Arnoldus, socioque ferenda petenti
1230Capsas et libros tradidit ille suos.
Inde simul dextris sociali foedere junctis
Parisius properant pectore, voce, pede.
Dumque simul pergunt, socio Burnellus eunti
Quis sit et unde refert, quae sibi causa viae,
Quos tulerit casus, quae sit discrimina passus,
Qualiter acciderint illa vel illa sibi;
Qualiter a patria primo discessit et ad quid,
Consilium dederat quod Galienus ei;
Brunettae casus varios causamque Bicornis,
1240Actibus expositis tempus utrumque notans;
Qualiter accepit a Truffatore Salerni,
Londoniis orto, vitrea vasa decem;
Qua ratione canes frater Fromundus in illum
Miserit et quantum perdidit ipse miser;
Inde canum mortem narrat saltumque sequentem
Fratris Fromundi judiciumque Dei;
Addidit et titulos bustali marmore scriptos,
Nunc quoque Parisius qua ratione petat.
Talia dicenti casusque suos memoranti
1250Reddidit Arnoldus talia dicta sibi.