Adsunt tempora fontium
Nunc festa: horridulos specus
Laeto Naïades pede
Vos liquisse juvabit,
Jam dona accumulant supra
Aras et simulacra, quae
Vestras aediculas prope
Udo in margine surgunt.
Croci spirat ad aethera
Et fragrantis amaraci
Odor: litora floribus
Coronatur aquarum.
Imis e latebris caput
Tollite hac hilari die,
Vestra et tempora floreis
Impedite corollis.
Aquis injicitur merum
Plenis egrediens cadis;
Tritonesque suavia
Bibunt munera Bacchi.
Et vobis cadit haedulus,
Cui vix cornua prodeunt
E fronte; undaque labitur
Rubro tincta cruore.
Vestra linquite, Najades,
Antra, et pectore rorido
Surgentes labra doliis
Admovete Falerni.
Peplis corpora candidis
Indutae pede virgines
Prompto cum pueris amant
Frequentare choreas.
Acres carmina tibiae
Cum blandis citharae modis
Jungunt: laetitia viae
Strepunt undique et aedes.
Imis cedite sedibus,
Pleno et, Naïades, choro
Nantes summa per aequora
Laetis plaudite palmis:
Seu vos Egeriae sacros
Iuturnae aut colitis lacus,
Capenae aut prope limina,
Vel fluenta Dianae.
Quippe tempora fontium
Adsunt festa: reconditos
Nunc vos, Naïades, specus,
Nunc liquisse juvabit.