Quem virgo invenit, cepit qui e virgine nomen,
Nomine vel trivii cuncta per ora sonat,
Dicite Pierides fontem: nam dulcior ipsis
Hippocreneis hinc fluit humor aquis.
Ausu romano tantae miracula molis
Extulerunt Petri ex ordine pontifices;
Quam contra usque gradum sistit, fruiturque tuendo,
Et stupet intentis advena luminibus.
Muscosos supra scopulos, quos dixeris ipsum
Neptunum medio constituisse mari,
Oceanus rerum genitor se se erigit, alto
Subjectos latices vertice despiciens:
Ingentesque aperit plantas, et brachia tendit,
Ceu qui cuncta suo continet in gremio.
Hinc atque inde scatent dulces e rupibus undae,
In concham resono prosiliuntque pede;
Quas modo pervolitat supra, celeri modo cursu
Lapsa bibit recreans multa columba sitim.
Tritones sed enim spumosa per aequora patrem
Jam jam tracturi frena minantur equis.
Tum divae ad latera assurgunt, quarum altera pellit
Crudeles morbos, altera ditat agros.
Haud inventricis desunt monumenta puellae, et
Agrippae magnum qui meditatur opus.
Desuper insculpto stant anni tempora saxo
Efficta, et variis cognita imaginibus.
Horret hyems canos glacie concreta capillos,
Ac trepida hirsuta corpora veste tegit.
Ver flores capiti innectit, manibusque refertis
Dat flores, multis floribus auget humum.
Tum spicas gestat messorum falce recisas
Aestas, cui sudor fronte genisque fluit.
Frugifer autumnus demum sua munera profert,
Mitia poma, uvis addita pampineis.
Haec sua tempestas siquidem fluvialibus omnis
Dona gerit nymphis, et sibi fausta rogat.
Quippe suos apto fundunt si tempore nymphae
E conchis latices, omnia rura beant.
Terrae namque sinum dum permeat humor aquarum,
Auras evolvit germina ad aethereas.
Sorbenti dein vi attractus, radicibus imis
Se se plantarum culmina ad alta vehit:
Atque abit in multas miro discrimine formas;
Fit color usque modis, fit sapor innumeris.
In virides lymphae frondes vertuntur et herbas,
Pinguia lanigero dantque alimenta gregi.
In violis pallet, candescit gutta ligustris,
Subrubet inque rosis inque papaveribus.
Componit varios et circum spirat odores,
Queis hortos replet, roscida prata, juga.
Mollior est baccho, cereri fit durior unda,
Dulcior in pomis pendet ab arboribus.
His laticum donis postquam romanus opimas
Collegit segetes, florea serta, merum;
Ad gelidos urbis fontes, tranquillus aquarum
Sub dulci somnos murmure prosequitur.