Cur hic versicoloribus lapillis
Inter discipulos nitet magister?
Ramos cur patulos super catervam
Protendunt virides utrinque palmae?
Suos discipulos jubet magister
Gentes innumeras fidem docere,
Ipse quam tulit e sinu parentis:
Et mentes radiis micantioris
Doctrinae et pietatis igne replet,
Novo et robore pectora auget, usquam
Ullis cedere nescio periclis.
Palmae sed patulos utrinque ramos
Protendunt, meritis ut inde frontem
Exornentque manum, simul phalanges
Frangant tartareas, et ipse Iesus
Invictis superos paret triumphos.