Sidereos jam moritura condit
Lux oculos: jam flammeo
Cremanda rogo Aurora
Mea reposcit flamina:
In nidulum ceu Phoenix
Vertenda dies meas optat alas.
Surgamus, et assueta
Feretro noctis et diei cunis
Afflemus ministeria.
Age, mihi madidantes
Depluant rore plumae matutino:
Stellentur imbre gramina.
Venatum petenti
Se prata Ladislao
Lepunensia comant.
Hyblaeo silva discolor nitore,
Sabaeo spiret halitu,
Panchaeo gemmet fletu.
Actoris instar regii
Meis efflata pennis
Innubilam serenet aura lucem.
In regis ministerium
Conspiret unda nitens,
Tranquillus aer, vere
Compta tellus.
Tu modo, rex, adesto:
Hic omnia nitescent
Clementi frontis fulgure.
Hic musicis, me ventilante frondes,
Vireta canunt sibilis,
Hic tellus per me verno
Crinita flore comitur.
Hic virides blanditur
Fucata genas, colorata vultus;
Hic ubi pellucenti
Fontium fletu rident valles,
Et ripa liquidum volvit gaudium.
Loquace tuum nomen
Fronde susurrent, Ladislae, silvae;
Magnique ducant nominis suspiria.
Qui silvis tccum ludibundus erro,
Cruentis olirn Martius
Afflabo bellis comes.
Tuis, Phoebe, classicis
Argenteos inspirans
Tubae canales, qua sol facem rotat,
Victorias cantabo,
Tuique alarum flamine mearum
Portabo famam nominis.