CANTUS.
Tibi grates, tibi laudes,
Caerula Tethy!
Tuo lapsus munere,
Opportune regia
Munera, piscis,
Nostra captus vincula sensit.
SALTUS.
Eoa parens Memnonis
Ut prodiit e specula,
Aureolosque crines
Luteolosque vultus
Ad oris tui speculum
Tergit comitque, Tethy.
CANTUS.
Dum nitenti munda fuco
Illinit ora,
Laetam frons purpuram
Surripit e conchulis:
Colla coralliis,
Tuis ornat ora baccis.
SALTUS.
Dum spargit ab aethereis
Rosarum nimbos hortulis,
Dum tua matutino
Rubescit unda vento,
Et pensilis in mediis
Florescit hortus undis.
CANTUS.
Te spumosis exspuentem
Oribus iras,
Teque proeliantibus
Campum ventis Martium,
Fluctibus Euros
Canet alter equitantes.
SALTUS.
Tranquillo vultus lumine
Te blandientcm canimus,
Et aureis arenae
Pulvillis acclinatam:
Sic usque nostro faveas
Piscatui serena.
CANTUS.
Tu terrarum vastos orbes,
Sedula mater,
Ulnis circum liquidis
Fusca cingis, vitreo
Ubere lactas,
Sinu geris aestuoso.
SALTUS.
Ex tuo Phoebus nitidum
Attollit caput gurgite,
Et igneo tranquillum
Dum globo radit aequor,
Apparet in argentea
Aurata gemma concha.
CANTUS.
Mane primo tu nascenti,
Vespere sero
Tu cadenti Delio,
Ceu Phoenici aethereo,
Liquido praebes
Toro cunas
Et sepulcrum.
SALTUS.
In te sol, pictor aureus,
Dum lumen nobis temperat,
Serena ludens pingis
Ridentis ora coeli:
Sic usque nostro faveas
Piscatui secunda.
CANTUS.
Tu grande Ladislai,
Vicina dum venatico
Exercet arva cursu,
Nomen sonoro fluctuum
Late tumultu persones,
Et usque nostro faveas
Piscatui secunda.