I
Dum lunae rura cingimus
Regiis venatibus,
Lunae choreas plaudimus
Chorea, in modum lunae.
Vecta serenum, luna, per aerem,
Tremebunda flammeo
Num venaris astra cornu?
Num bellatrix igneo
Aetheris ursos impetis arcu?
II.
Nocte silenti, voce faventi
Tibi latrant catuli:
Tibi socium venanti,
Luce spumat aurea
Rabidae sidus triste Catellae.
III.
Modo recurvis edita cunis
Primo ludis lumine;
Modo pleno nites ore;
Mox incurva senio,
Moesta cadenti extingueris igne.
IV.
Orbe nigranti clausa secundum
Temet ipsa latitas.
Tibi rogus et sepulcrum,
Ternet ipsa tumulas;
Mox redivivos excitas ignes.
V.
Fida diurni luminis haeres,
Occidente Delio,
Breve sideris fraterni
Reparas dispendium
Late micantis frontis honore.
VI.
Modo nitenti falce minaris:
Modo jugo cymbula,
Modo portu sinuaris,
Et mutantem simulas
Aequore coeli Prothea formas.
VII.
Quidquid liquidis innatat aquis
Foeto quidquid viscere
Terra parit, tibi paret.
Tuis nutat nutibus
Refluus humor aequoris alti.
VIII.
Annue nostro dextra venatu.
Tibi dentes camuri
Apri torva minitantis,
Tibi quercu pendeant
Ardua nostrae cornua praedae.
IX.
Dubiae viden’ lucis in umbra
Tuis pares vultibus,
Tibi in orbem, tibi in arcum
Agitamus choreas:
Annue nostro dextra venatu.
X.
Cursibus aptas suffice vires,
Vimque odoram canibus:
Telo feras, tela feris,
Telis ictum dirige:
Robora fessis adde lacertis.
XI.
Aurea sed jam proditur Eos,
Et venatrix roseo
Astra nocturna fugat arcu.
Hebetata retrahit
Delia lucem, luce renata.