I
Medium torquens Cynthius axem,
Gravis arcu jaculatur
Tela lucis aureo;
Rutilo latrat
Sirius astro,
Nec venatus regi
Cedit labor: tantus amor,
Tanta repertae gloria praedae.
II.
Igneus acres
Fert Molossos impetus.
Crebra volant tela manu,
Ora tepenti sparsa liquore,
Corda calenti laudis amore,
Face fervent geminata:
Creber artus halitus
Quatit anhelos.
III.
Aurae molles, lenes aurae,
Zephyri, formosa natio,
Administra Chloridis,
Et supremum jam diei
Exspirantis halitus,
Cum nox, lucis filia coeca,
Saeva claudit
Lumina dextra:
IV.
Mobiles aurae,
Vernulae tubicinae,
Odorata quae miscetis
Pratigenarum proelia florum,
Languida victae lacrima noctis,
Matutino quae proflatu
Gelidae restinguitis
Volucres aurae.
V.
Deliam vestro flamine flammam
Temperate venatrices.
Vos algente dextra,
Rore madentes
Tergite frontes.
Telis alas addite:
Catulorum venatorum
Cursui vestras indite pennas.
VI.
Forte virenti
Si locarint gramine
Fessa longo membra cursu,
Undique lectos ruris odores
Spiritus illis florifer afflet.
Vos ridentes ora circum
In amica pellite
Oscula flores.
VII.
Sic per amoenas aequoris oras
Curru vos argenteo
Caerula vectet hospita Tethys:
Sic per arva volitantes
Vos tenelli lusitantes
Osculentur flosculi.