I.
Placidi rores matutini,
Qui sereno lapsi coelo
Mollia florum
Versicolorum
Ocellatis folia:
Qui florentibus in conchis
Late viretis
Aequore prati gemmulatis;
II.
Vigiles hortis ab Eois,
Florae rores olitores,
Arida pratis
Ora rigatis
Urnulis argenteis.
Vos Aurorae fulgurantis
Tacitus imber,
Guttulae coeli desudantis.
III.
Nitidum fiavae lac Matutae,
Cum luteolas papillas
Tenero florum
Inserit ori,
Odoratis populi
Coloratis cum labellis
Rosae circum
Ubera matris nutriuntur.
IV.
Stellulae noctis decedentis,
Stillae rorum, coeli rores,
Sidera ruris,
Sidera rores,
Flosculorum lacrimae,
Cum madenti liquent ore,
Diraque lugent
Funera noctis occidentis.
V.
Antra petentum vos ferarum
Pressa vago signa pede,
Limite fido
Prodite, rores.
Certa per vestigia
Ad latentem venatores
Ducite praedam,
Placidi rores matutini.