Nec Lechus, neque Lechicis
Proles ille fuit nata nepotibus,
Primus qui docuit suis
Urbes Sarmatiae fidere machinis.
Campestres bene Sarmatae
Campo bella gerunt: sub Jove libero
Natam militis indolem
Frustra belligero clauditis otio.
Arctis oppida moenibus
Virtutem cohibent, dura male fortibus
Addunt consiliis moram, et
Crescentes hebetant Martis adoreas.
Sic non vincimus, ut diu
Vincamur; miseri, ni vetet exteri
Campestris manus auxili
Hostem quassa diu cingere moenia,
Aut vis vivida civium,
Rumpentis nebulam more tonitrui,
Clauso proruat oppido,
Et murum solido pectore suppleat.
Agrestes melius ferae,
Quarum non vacuis jurgia sub jugis,
Sed plano generosior
Campo pugna calet. Prodit inertibus
Antris impavidus leo,
Hostem conspicuis sternere collibus.
Aer ingenuis patet
In pugnas aquilis. Mollibus evolat
Nidis, cum violentior
Visis accipiter pugnat oloribus.
Quid nos picta leonibus
Frustra parma tegit? Cur Jovis alitem,
Aut cur accipitrem cavo
Gestemus clypeo, si male Martiae
Respondet nota dexterae,
Nec pulso resonat gloria pectori?
Quod si non vacuum genus
Jactamus timidi, cur fugimus sacrum
Immiscere periculis,
Coelo teste, caput, non sine stemmate?
Magno magna ruant loco,
Aut vincant. Videat sol melius mori
Quod nasci bene viderat,
Et laudis spatium mors habeat suae.
Hac virtute Chaber vagum
Sub consanguineae ju ra Poloniae
Jussit ire Borysthenem,
Captivique super marginibus Salae,
Et Silesidos Oderae,
Metas imperio fixit aheneas,
Qua certo pede gloriam
Stantem non stabilis praeflueret liquor.
Nos foedam Lare patrio
Aetatem tegimus, solliciti parum,
Quam vicinus aret Gothus,
Vel quam frugiferae rura Podoliae
Creber diripiat Scythes:
At non et madidi sub jubar Hesperi
Inter pocula nescii
Noctem sanguineo ducere jurgio.
Quod si prima senes hiems
Admovit tepido cum pueris foco,
Patrum dicere proelia
Hausto non humiles historici mero,
Foecundam scelerum pii
Aetatem querimur, quam nova posterum
Deturpavit inertia.
Frustra: si positis mox eadem patres
Inter pocula liberis
Flemus, quae miseri saecula fecimus.