Si quem cruentae vultus adoreae,
Si fusus auro miles, et inclyti
Urunt in argento triumphi,
Artifici simulante dextra,
Sculptaeque laudes, et titulis super
Afflata signis vita Corinthiis,
Cultusque moresque et perenni
Paene loquax sua fama saxo:
Hic si locari postgenitis sacer,
Et per nepotum lucidus atria
Quaerit videri: destinatam
Funeribus meditetur aram,
Vultumque vultu fingat Achillei,
Dextramque dextrae commodet Hectoris,
Dignus Timanthea notari
Arte, Syracosioque coelo:
Letique curta merce perennius
Lucretur aevum: quos sibi dempserit,
Caris redonaturus annos
Conjugibus puerisque caris.
Hic si timendus gestit aheneis
Horrere squammis, quem litui sonus
Saevique conjurata Martis
Signa vocant, clypeo subire,
Sparsumque crinem versicoloribus
Mutare cristis, et rapidum vehi,
Dum per rejectantes lacertos
Ambiguae fluitent pharetrae:
Illum palustri consita fraxino
Poscit Methone, poscit Acarniae
Lacus Tanagreique saltus,
Aut graciles Marathonis orni,
Gnossosque telis, et resonum gravi
Stymphalon arcu. Non chalybum rudis
Lemnos, nec inconsulta ferri
Phocis erit, nec inermis Oea.
Si rursus idem bella fidelibus
Committat Euris, aequoris impiger,
Veloque et obluctante remo
Ortygiis equitabit undis:
Illi Cytori pinus, et hispidae
Cupressus Idae brachia frondium
In transtra, et haerentem carinam
Contrahet: aerisonamque puppim
Non imperito remige muniet
Euboea: remos Thespia suggeret,
Ausamque despectare nubes
Veliferam dabit Ossa pinum:
Aut qui comatas educat ilices
Caycus, aut qui limpidus assitas
Maeander intercurrit alnos,
Aut dubii vagus error Hebri.
Nec si superbus poscat eques vehi,
Pugnae scientes Ismara denegent
Pullos, relicturasque retro
Aut Noton aut Aquilona plantas,
Si bellicosos proruat accolas
Servilis Haemi, sparsa sequi celer
Vexilla, palantemque lunam
Haemoniis agitare campis.
Illum et colossis conspicuum dabit
Venalis omni funere gloria, et
Doctis renascentem metallis
Orchomenos, vel amica vivum
Non pejeranti marmore Neritos
Ementietur, nec Capitolia
Mutum, Palatinmve moles
Stare sinent sine laude civem.