Quis me citatus pectoris impetus
Denso sedentem propulit aere,
Currusque nimborum morari, et
Per medias equitare nubes,
Et plana terrarum, et populi casas
Regumque turres non sine gaudio
Calcare sublimem, et superbo
Regna super volitare curru?
Rerumne falsa ludor imagine?
An picta mundi moenia, et igneas
Arces, eoronatumque flammis,
Et liquidum sine labe solem
Praevertor? Hic et patria siderum,
Clarusque coeli baltheus aurei,
Campique stellarum, et decemplex
Perpetuo redit aula gyro.
Qua parte coeli principis aureas
Inscribo laudes? Hinc adamantinis
Aeternus Orion in armis,
Et gemino prope Castor igni
Fortem reposcunt. Hinc gravis Hercules
Famae propinquum postulat Herculem:
Hinc noctis immunem et veterni,
Parrhasii vocat ora plaustri.
Acrem et timori cedere nescium
Addam Leoni: quem penes igneae
Aestatis arvorumque cura, et
Flava Canis Cererisque regna?
Justam et tenacem propositi manum
Mundi serenis partibus asseri
Exspectat Autumni Virago:
Quae geminam sine fraude Libram
Aevique frenos, et celeres vehi
Compescit Horas. Hinc tibi patrio,
Francisce, cedentes Olympo
Pleiadas Hyadasque cerno:
Illic laborat Phosphorus hospitas
Laxare nubes: hinc tibi lucidus
Collumque repentesque coelo
Scorpius abstinuisse chelas,
Auroque comptum Marmaricus Leo
Crinem totondisse, et radiantium
Opima villorum, et jubatas
Velle polo revocare flammas.
Insculpta coelo gloria sospitat
Heroas: anni caetera subruunt:
Aulaeque, sceptroque, et columnis
Excidium sua dixit aetas.