Ergo minaci credulus Africo,
Tumultuosi marmora Nerei,
Pugnasque ventorum, et tyrannos
Aeoliae superabis aulae?
Nec te marinae torva licentiae
Imago terret? nec timor aequoris
Enavigandus? nec protervis
Ille frequens equitatus Euris?
Sed contumaces Aeoliae minas,
Iramque ponti spernis, et obvios
Mundi furores irretorta
Fronte subis similique vultu,
Quo feriantis moenia Tusculi,
Aut otiosi jugera Tiburis
Perambulaturus subibas
Egelidos Anienis amnes?
Hoc ore motae dira protervia
Subsidet undae. Jam video procul
Ad littus acclinata leni
Aequora decubuisse somno,
Et dormientis flamina Nerei
Spirare pacem. Scinde tenacium
Moras rudentum: perge classem
Velivolis animare ventis.
Regina terrarum et pelagi potens
Formidolosos diruet objices
Periculorum, nec sinistris
Ire dabit tua Fata velis.