Non vivi paries vitri
Crystallique fores, aut Mareoticis
Aurum postibus illitum,
Laudandum memori carmine principem
Clarabit: neque barbaras
Decidet tumulo gloria laureas:
Sed frons mitior adspici,
Inn ubique nitens ore meridies,
Et, qui sospitat omnia,
Irati vacuus nube supercili,
Primo gratior Hespero
Formosus rosea vultus in Iride.
Regum vultus imagine
Regnorum legitur. Pandite lumina, et
Vultum pandite, principes:
Jam vultum, et populi lumina vidimus.
Irasci populum docet,
Qui torvis nebulam nutibus addidit:
Idem supplicii piger
Maturis faciem risibus explicet,
Caedesque, et populi graves
Iras, et procerum proelia, et asperas
Regum contuderit minas.
Vulgus bella fremat: te nihil attinet
Foedo turbida nubilo
Mutari pavidis ora coloribus.
Yeris janitor aureus,
Qui campis liquidi pascitur aetheris,
Stellatis Aries comis,
Picti rura poli frenat, et arbiter
Mundi prata perambulat:
Iraeque et placidi lenior imperi
Ursis praesidet et lupis;
Demitque, et dominis cornibus annuit
Torvis jura leonibus,
Castigare vagos acer, et igneis
Mundi cogere sepibus.
Vultur, degenerum parcior unguium,
Albis parcit oloribus:
Compescit volucrem Bellerophon equum
Nusquam monstra vagantia
Chiron Haemonia figit arundine.
Colludit Geminis Leo, et
Taurum supplicibus conciliat jubis.
Nusquam sidera mugiunt,
Aut latrat Procyon, aut Libyco duplex
Rugitu reboat polus.
Labuntur tacito summa silentio:
Tranquillaeque tacent rotae,
Dum currus vigilum volvitur ignium.
Tantum lanigerae facis
Balatu resonat mundus amabili,-
Rixaque et strepitu vacat:
Et se mundus amans, ipse sui prope
Vivis lucet amoribus;
Naturaeque uterum, et parturientia
Zona sidera subligat:
Hanc flexis Aries cornibus inchoat,
Rerum nobile vinculum, et
Conjux signiferi fibula balthei.