Credetis? Io, credite, Posteri,
Fractos pudendo Bistonas impetu
Cessisse, et infaustis redemptam
Funeribus pepigisse pacem.
Quis tunc recentes Odrysiis timor
Affixit alas, cum refugas metu
Prae se Ladislaus phalangas
Fulmineis agitaret armis?
Quantus Gelonis, quantus erat feris
Sudor Corallis! cum prope decolor
Ister, verecundusque capta
Bosporus erubuisset unda.
Cum versa Thracum parma trementibus
Fronderet hastis, cum celer Artacen,
Turresque Byzanti probrosis
Concanus assonuisset armis.
An nos repensam sanguine gloriam
Frustra futuris emimus? An suos
Exempla diffingent nepotem
In proavos, similemque patri
Gnatum reponent? Quatenus (heu pudor!)
Pejor nefastis progenies avis
Succrevit, et damnosa pulchras
Saecula diminuere vires.
Vel nos avitae stemmata gloriae,
Currusque, et enses, nuper et hosticis
Direpta delubris tropaea,
Haemoniae monumenta pugnae,
Uramus igni: neu pudeat sacros
Mentita vultus frangere marmora:
Non aera, fumosasque patrum
Effigies, memoresque laudum
Ceras, profundo mergere Vistula:
Vel, si supinae taedet inertiae,
Martemque, majoriunque pugnas
Egregiis iterare factis
Juremus. O, quem gloria fervidis
Urbesque, terrasque, et populos super
Evexit alis, o caduci
Grande decus columenque mundi,
Pridem Geloni sobria sanguinis
Rursum Polonis deripe postibus
Et tela, princeps, et timenda
Edoniis refer arma signis.