Quae nos, Rywoci, tot rea cladium
Damnamus olim saecula, posteri
Elapsa laudabunt, et aureis
Moribus ac meliore coelo
Fluxisse dicent. Plebis in auribus
Absentis est vis debilior mali:
Quantumque paullatim sinistris
Detrahit invidiae vetustas,
Tantum secundis addit adoreae.
Plerumque reges, quos procul aemulo
Subducit e rerum theatro,
Consecrat indigetatque virtus.
Sic et minoris nomen Achillei
Sacris adorat non sine lacrimis,
Toto triumphaturus orbe,
Rex Macedum: Macedumque regi
Major triumphos et genus invidet
Et Caesar aras. Splendidius micant
Longinqua, mentitumque ducunt
Temporis a spatio colorem.
At qui per omne providus ac memor
Respexit aevum, jam melioribus
Praeire, jam post ferre, jam se
Jungere deteriora vidit;
Magnaque qua se mundus agit rota,
Humana verti. Cur ego livida
Cum plebe, praeclaro nepote,
Semper avos atavosque laudem?
Quinto Secundus cur Carolo minor
Sit Ferdinandus? cur Decimo parem
Non mirer Urbanum Leoni
Dardaniae dare jura Romae?