Sol, qui terrarum flammis opera omnia lustrat,
Extulit os sacrum caelo tenebrasque resolvit.
Laetitia ludisque viae plausuque fremebant,
At Venus aetherios inter dea candida nimbos
Aurea subnectens exertae cingula mammae, 5
Dona ferens, pacem aeternam pactosque hymenaeos
Atque omnem ornatum, Capitolia celsa tenebat,
Punica regna videns, Tyrios et Agenoris urbem.
Hinc atque hinc glomerantur Oreades et bona luno.
Incedunt pariter pariterque ad limina tendunt. 10
Tectum angustum, ingens, centum sublime columnis,
Hae sacris sedes epulis, atque ordine longo
Perpetuis soliti patres considere mensis.
Una omnes, magna iuvenum stipante caterva,
Deveniunt faciemque deae vestemque reponunt. 15
Dant signum, fulsere ignes et conscius aether
Conubiis, mediisque parant convivia tectis.
Fit strepitus tectis vocemque per ampla volutant
Atria, ubi adsuetis biforem dat tibia cantum.
At tuba terribilem sonitum procul aere canoro 20
Increpuit mollitque animos et temperat iras.
It clamor caelo, cithara crinitus lopas
Obloquitur numeris septem discrimina vocum,
Iamque eadem digitis, iam pectine pulsat eburno.
Nec non et Tyrii per limina laeta frequentes 25
Convenere, toris iussi discumbere pictis.
Tunc Venus aligerum dictis affatur Amorem:
“Nate, meae vires, mea magna potentia solus,
“Huc geminas nunc flecte acies, illam aspice contra.
“Quae vocat insignis facie viridique iuventa, 30
“Iam matura viro, iam plenis nubilis annis,
“Cui genus a proavis ingens clarumque paternae
“Nomen inest virtutis et nota maior imago.
“Hoc opus, hic labor est; thalamos ne desere pactos!
“Credo equidem, nova mi facies inopinave surgit. 35
“Nonne vides, quantum egregio decus enitet ore?
“Os humerosque deo similis, cui lactea colla
“Auro innectuntur, crines nodantur in aurum,
“Aurea purpuream subnectit fibula vestem.
“Qualis gemma micat, qualis Nereia Doto 40
“Et Galatea secant spumantem pectore pontum.
“Cura mihi comitumque foret nunc una mearum!
“Hanc ego nunc ignaram huius quodcumque pericli est,
“Cum tacet omnis ager, noctem non amplius unam
“Conubio iungam stabili propriamque dicabo. 45
“Hic Hymenaeus erit monumentum et pignus amoris.
“Incipe si qua animo virtus, et consere dextram.
“Occultum inspires ignem paribusque regamus
“Auspiciis: liceat Frido servire marito,
“Cui natam egregio genero dignisque hymenaeis 50
“Dat pater et pacem hanc aeterno foedere iungit.”
Paret Amor dictis carae genetricis et alas
Exuit et gressu gaudens sic ore locutus:
“Mecum erit iste labor; si quid mea numina possunt,
“Cum dabit amplexus atque oscula dulcia figet 55
“Inmiscentque manus manibus pugnamque lacessunt,
“Nusquam abero, solitam flammam (datur hora quieti)
“Desuper infundam et, tua si mihi certa voluntas,
“Omnia praecepi atque animo mecum ante peregi.
"Sentiet!” atque animum praesenti pignore firmat. 60
Illa autem (neque enim fuga iam super ulla pericli est)
Cogitur et supplex animos summittere amori.
Spemque dedit dubiae menti solvitque pudorem.
Illum turbat amor; ramum qui veste latebat
Eripit a femine et flagranti fervidus infert. 65
It eruor inque humeros cervix conlapsa recumbit.
His demum exactis geminam dabit Ilia prolem,
Laeta deum partu, centum conplexa nepotes.