Epigrammata (Sarbievius) — CLXXXVII. In eodem funere.

Vix Othomanigena succisum falce cadaver
Fraterna in patrios cura reduxit agros:
Parva salutatum concurrit turba nepotum,
Coeperat et bleso quaerere multa sono:
Sensit ubi mutum, nec responsare paratum,
In lacrimas sic est moesta soluta cohors.
Heu nos! heu! inquit, quis, patrue, nostra revisis
Tecta? Ubi vox casto plena lepore manet?
Non sileo, non, inquit, ego. Vox lapsa per auras;
Tota in Valachicis nostra loquela plagis.