Epigrammata (Sarbievius) — CCLIII. Idem argumentum.

Flebilis absentem reperit dum Magdala Sponsum,
Inque suum Jesu pectore pectus habet:
Bina per afflictos iverunt flumina vultus,
Ibat et in miseram ros pretiosus humum.
Ros hic Olympiacos consueverat ire per hortos:
Nescio, non suetam cur modo poscat humum.
Cum Deus in coelis, ad coelos lacrima currit;
Quando Christus humi, lacrima scandit humum.