Serpillum veteres dixerunt, quod quasi serpat 1325
terrae vicinum; huic fervida siccaque vis est.
Acri cum vino coctum contundis olivo,
cui rosa dat nomen, hoc unguine perline frontem
aegroti, capitis solet hoc sedare dolorem.
Nidor combusti serpentes effugat omnes 1330
et quodvis animal infundens ore venenum;
hoc ideo miscere cibis messoribus est mos,
ut si forte sopor fessos depresserit illos,
vermibus a nocuis tuti requiescere possint;
pestiferos morsus bibitum juvat appositumque. 1335
Provocat urinas, compescit tormina ventris,
splen juvat, admixto si saepe bibatur aceto;
si mel praedictis jungatur, sputa cruenta
jactantes mire potus solet ille juvare;
Haustum cum vino jecoris sedare dolorem 1340
dicitur, hicque solet producere menstrua potus.