Amator ad sepulcrum queritur.
Hic soli mihi fiere licet; tu, laurus, et una
myrtus, ades, paucis et, lapis icte, notis.
Parve lapis, quem flore novo, quem ture Sabaeo
et veneror multa tum prece, tum lacrima,
tu mea, tu miseri tumulo male contegis isto
gaudia, et exsultas, saeve, dolore meo;
redde meos, mihi redde meos, redde, improbe, amores.
Quid iuvat e lacrimis immaduisse meis?
Immadeas, maduisse iuvet, si non mea flendo
lumina siccatae deficiunt lacrimae;
sed lacrimas tibi habe, nec enim queror, accipe odores,
accipe cum fletu munera mixta suo.
Unguenta atque rosam et costum properate, puellae,
et violam et cunctas spargite veris opes,
spargite opes Arabum; lacrimas ego; tu, lapis, illas
ebibe et in rorem, lumina, abite novum.
Rore novo madeat tellus, quae contegit ossa,
ossa pios manes, numen et ossa meum.
At tu perpetua, laurus, quae fronde virescis,
tu, myrtus, de qua Myrtila noraen habet,
fundite odoratos flores silvamque perennem
ad tumulum, lacrimis crescite et usque meis,
crescite: iam in latices, liquidum iam solvor in amnem,
iam fiuo; sed fluidum me tamen urit amor.