CHRY. Cur hac noctu non es mecum? Quo nunc properas?
Mane, amabo! Dormito hic, ut nudi simul
in amplexu simus. Cur mihi suppetias
quasi gravastellus das? SEDU. Ne noceam tibi.
CHRY. Ohe! Ne noceas, ais? SEDU. Aio: balneum
quis tibi persolvit, aut tu cur hodie
preter morem lavisti? Tete illic habeat,
argentum qui dedit. Nam qui dat, ipsus parum
iniurius, si tibi lucrum auferat, siet.
CHRY. Parvi me pensitas et me facis nihili,
qui rivalibus me quam tibi vis potius.
At at... SEDU. Quid «at at»? Tui causa facio,
ne dantes abigam, qui prebeo perparum.
CHRY. Hem! Dantes! Quasi me plurimi nunc habeant,
quod tu solus et unus, vel... SEDU. Aha, «vel»! Scio:
nemo nisi ego te unus, vel centum alii!
CHRY. Expetessunt plures, paucis datur frui.
Sic me dii amassint, ut preter te vix duo
consueverint mihi. Nunc, ut mundior tibi
advenirem, lavi. Tibin sum morigera?
Anime mi, mane, mane! Noli irascier.
LY. Ut blanda est meretrix! Iam tendit insidias.
Viden ut amplectitur, quasi amatrix probe?
Non mihi has induceres sicophantias;
aurum his verbis ut venerit studes, pessuma!
Novi ego mores meretricis; namque, cum
pauper est, arridet et quidvis facit.
Amare assimilat, non amat, quando lacrimas
ut lubet vortit atque ut volt: obediunt
meretrici lacrime. At istic sese putat
alterum Ganimedem aut Parin coli alterum.
Nosce te, Seduli: istuc etatis hominem
non amat mulier; si quid das, amat.
Aliam vitam et mores iam debes alios
istac etate induere; nam vesperus adest.
SEDU. Sic est, nec me quod dicis latet. Nugas scio
istarum. LY. Quid igitur heres? Quid hic agis?
Nulla hic habenda est mora, postquam Venus iacet.
Quin imus et aliis cedimus? SEDU. Animo
gerundus mos est; lubet ridere cum ioco.
Scortis ut scortis utor: simulant, simulo;
fingo me captum nec sum; par pari refero.
LY. At istuc, hercle, magni plenum est discriminis.
Urit amor pusillatim clamque ingreditur,
et iocos scimus in seria mutarier.
Vide, sis: nam, si ardere incepisses, spoliis
te direptionique para, quasi sies
captivus. Tigris est, non mulier, meretrix;
cum amari scit, petit, capit, spoliat, rapit.
SEDU. Desine, scio. Quid, malum, in fornice venis
philosophari? Leno hic, non Cato, loquitur.
LY. Decet ubique bene loqui atque facere.
Non veto scortari, sed scortari nimium.
CHRY. Quid vos inter vos his murmurationibus
concertatis? Adesto, Seduli, propera.
SEDU. Adsum. CHRY. Sequere me huc intro. SEDU. Sequor lubens.