Quid juvat ad tempus nugarum linquere larve,
105.0373A| Si demum repetit quis malesanus eas?
Surgere quid prodest, si statim corruet illa
Qua jacuit segnis quis labefactus humo?
Fertur anum natus matrem exorasse puellus,
Atque illi tales deposuisse preces:
O genitrix, nostri quam semper cura remordet,
Charior et vita tu mihi es, ipse tibi.
Mox dederit cantum lucis praenuntius ales,
Confestim memet evigilare stude.
Illa, Geram quod amas, sed age quid, dic mihi, nate?
Obdormire, inquit, forsan item potero.
Nec minor interea dementia ceperat illum,
Venatus retulit qui bona nulla sui.
Denique prudenter geritur venatio, quando
aut jocus, aut quaestus est, vel utrumque simul.
105.0373B| Prensa solent lucrum capreae dare, cervus, et alces,
Castor, dama, bisons, bubalus, ursus, aper.
Figere nam lepores jaculis, captare molossis.
In modico lucro visus amoenus inest.
Diversa duo sorte canisque lepusque volantes,
Alter ubi praedam quaerit, et alter opem.
Ungue cibum canis, ungue petit lepus ipse salutem,
Diverso et voto sic labor unus eis,
Horum amor et studium delirum invaserat illum,
Qui nullo capto taliter orsus erat.
Subjectas valles extensaque rura peragrans,
Est lepus inventus sed mihi nullus in his:
Jam sine venatus lucro ad mea tecta redibam,
Et quia nil potui prendere, tristis eram.
Saltus inest modicus, quem cingunt undique campi,
105.0373C| Qui rarus nostra distat ab aede parum.
Esse feram quis ibi, leporem vel crederet unquam,
Cum foret a villa proximus ille locus?
Hac mihi cunque die leporum spes nulla maneret,
Ex illisque lucrum rerer abesse mihi.
Lustro locum, mittoque canes, et retia pono.
Quis studio gestis, nullum ibi reperio.