Haec domus alma Dei est via qua itur ad atria coeli,
Hic patet ecce bonis porta serena poli.
Haec via, vita, salus. Christus sua templa revisit,
Justorum acceptans munia, vota, preces.
Hic bene Quintini requiescunt ossa beati,
Qui studuit Domino rite placere suo.
Sanguine qui proprio est mercatus coelica regna
Atque locum sibimet emit in arce poli.
Cujus martyrium devota mente frequentat,
Plebs vivens, quaerens et peregrinus opem.
Quos memores nostri Fulradus cernuus opto
Ut vestri semper sit memor ipse Deus.