1. Sole regente lora
Poli per altiora,
Quedam satis decora
Virguncula
Sub ulmo patula
Consederat, nam dederat
Arbor umbracula.
2. Quam solam ut attendi
Sub arbore, descendi
Et Veneris ostendi
Mox iacula,
Dum noto singula,
Cesariem et faciem,
Pectus et oscula.
3. "Quid", inquam, "absque pari
Placet hic spaciari,
Dyones apta lari
Puellula?
Nos nulla vincula,
Si pateris, a Veneris
Disiungent copula".
4. Virgo decenter satis
Subintulit illatis:
"Hec, precor, obmittatis
Ridicula,
Sum adhuc parvula,
Non nubilis nec habilis
Ad hec opuscula.
5. Hora meridiana
Transit, vide Tytana
Mater est inhumana.
Iam pabula
Spernit ovicula
Regrediar, ne feriar
Materna virgula."
6. "Signa, puella, poli
Considerare noli.
Restant immensa soli
Curricula,
Placebit morula,
Ni temere vis spernere
Mea munuscula."
7. "Muneribus oblatis
Me flecti ne credatis,
Non frangam castitatis
Repagula.
Non hec me fistula
Decipiet nec exiet
A nobis fabula."
8. Quam mire simulantem
Ovesque congregantem
Pressi nil reluctantem
Sub pennula,
† flore et herbula
<>
Prebente cubicula.