Nous n’entrons point d’un pas plus avant en la vie
Que nous n’entrons d’un pas plus avant en la mort,
Nostre vivre n’est rien qu’une eternelle mort,
Et plus croissent nos jours, plus decroit nostre vie :
Quiconque aura vescu la moitié de sa vie,
Aura pareillement la moitié de sa mort,
Comme non usitee on deteste la mort
Et la mort est commune autant comme la vie :
Le temps passé est mort, & le futur n’est pas,
Le present vit, & chet de la vie au trespas
Et le futur aura une fin tout semblable.
Le temps passé n’est plus, l’autre encore n’est pas,
Et le present languit entre vie & trespas,
Bref la mort & la vie en tout tems est semblable.