Des l’àge tendrelet de l’indiscrette enfance
Qu'oyons nous, Bon-compain, que plaintes & que dueil,
Helas ! que voyons nous qu'Epitaphe & cercueil
Des mors qui vont dormir le sommeil d'oubliance ?
Et si le fait d'autruy si avant ne s'avance
Dans nos cuers engourdis, combien dessus le sueil
De leur clarté premiere, en voyons nous à l'œil
De nos proches parents mourir de violence ?
Et puis nous appelons le trespas impourveu,
Qui de nous à toute heure en tant de lieus est veu,
Voire sans en bouger à nos sens se presente :
Meditons y souvent, & nous ne serons point
Despourveus ny douteus reduis au dernier point,
La mort inopinee est rarement constante.