Wis willekomen wunneklicher meie·
wan dú froͤwest manig herze das ê trurig was·
din kvnft wil fromen dc vil manig reie·
wirt gesvngen da die blůmen dringent dvr dc gras·
da bi singent vil der vogellin·
suͤsse doͤne gegen der schoͤne din·
Hohgemvͤte·
git ir wibes guͤte·
mir gegen ir·
Die selderichen minne ich sender tǒgen·
in dem herzen wan mit wart so liebes nie niht kunt·
gar lachelichen stent ir spilnden ǒgen·
ah wie gar zekusse stet ir wol geroͤter mvnt·
wie gar wol gestellet ist ir lib·
ach ich meine dc vil reine wib·
Hohgemvͤte·
git ir wibes guͤte·
mir gegen ir·
Dú suͤsse minne minnet mich trúwen·
das si mir so gar an die vil minneklichen riet·
min rehten sinne darf es niht gerúwen·
dc si sint an ir von der min herze nie geschiet·
we wes moͤhtens anders han gegert·
die ich kroͤne dú ist schoͤne wert·
Hohgemvͤte·
git ir wibes guͤte·
mir gegen ir··
Min lieb min frowe miner ǒgen wunne·
gar der hohste trost gegen froͤiden der mir ie wart kunt·
min trut ich schowe dich fúr ellú kúnne·
lieber minem herzen wan dv bist gelúkes vunt·
dv bist meisterin an wibes zuht·
ich wil gruͤssen dich vil svͤssen fruht·
Hohgemvͤte·
git ir wibes guͤte·
mir gegen ir··
Genade sende mir genedeklichen·
herzeliebe svͤsse frowe reine selig wib·
min sorge wende mir vil sorgenrichen·
sit so gar genedig ist din minneklicher lip·
swie ze troste mir din roter mvnt·
wil sin lachen lieblich machen kvnt·
Hohgemvͤte·
git ir wibes guͤte·
mir gegen ir·