Spilnde wūne·
wil vns d̾ meie bꝛīgē·
wir ſvn froͤlich reien ſingē·
lieb̾ mere 206r ſin gemeit·
ſwer ſich kvnne·
mit liebe lieblich zweien·
der ſol froͤide in h̾ze heien·
lieb froͤit wol fúr h̾zeleit·
ſwer ſich liebes kan·
trutlich vnd̾windē·
der mac h̾ze froͤide vinden·
liebes wib vn̄ lieb̾ man·
Swer erkvnnet·
wc lieb an liebe minnet·
vn̄ wie lieb nach liebe ſinn·
wie lieb liebe liebē ſol·
ſwar der wūnet·
ſo ſinnet eht ſin gemvͤte·
ie nach reiner wibeſ gvͤte·
es froͤit niht ſo rehte wol·
wer kan māneſ lib
bas vō ſoꝛgē zoͤhē·
vn̄ ſin hohgemvͤte erhoͤhen·
dan ein reine ſelig wib·
Swem ſin h̾ze·
gegen liebe mīne enbꝛennet·
vn̄ doch h̾zelieb erkennet·
da tůt liebe wol vn̄ we·
mīne ſm̾ze
ī iamer h̾zen ſeret·
lieb gedinge leit v̾keret·
ob ich rehte mich v̾ſte·
lieb gedinge iſt gůt·
wol fúr h̾zen ſwere·
doch gelǒbent mir ein mêre·
iamer h̾zen ſere tůt·
Etteſwenne·
leb ich in zwiuel wane·
dc dú liebe wolgetane·
minē mv̊t iht gar v̾ſte·
ich erkēne·
niht lieber lieb vf erde·
nach dem h̾zen min ſo w̾de·
weſ wil ſi mich twingē me
ſi ſol ſin gew̾t·
ſwaſ ſi mir gebútet·
ſi iſt die min h̾ze trútet·
ach wer ich ſo wert·
WJe dú here·
dú liebe vn̄ dú vil reine·
die ich voꝛ allē wibē meine·
mir bekv́nbert hat dē můt·
ſwar ich kere·
ſo ſenent mine ſinne·
nach ir w̾den wibes mīne·
ſi iſt noch beſſer danne gůt·
wafen ſend̾ not·
můs ich ſi v̾midē·
wie ſol dc min h̾ze erliden·
ſo bin ich an froͤidē tôt·