Sach iemā die frowē·
die man mac ſchǒwē·
in dem venſter ſtan·
dú vil wol getane·
dú tv̊t mich ane·
ſoꝛgē die ich han·
ſi lúhtet ſam der ſvnne tůt· gegē dem liehtē moꝛgē·
ê was ſi v̾boꝛgen·
do mv̊st ich ſoꝛgen·
die wil ich nv lan·
Iſt aber ieman hinne·
der ſine ſinne·
her behalten habe·
der ge nach der ſchonē
dú mit ir kronē·
gie vō hinnē abe·
dc ſi mir ze trôſte kome ê dc ich v̾ſcheide·
dú liebe vn̄ dv́ leide·
dú wellen mich beide·
fúrdern hin ze grabe·
Wan ſol ſchꝛiben kleine·
reht vf dem ſteine·
der min grab bevat·
wie lieb ſi mir were·
vn̄ ich ir vnmere·
ſwer danne vb̾ mich gat·
dc der leſe diſe not vn̄ ir gewīne kúnde·
der vil grôſſen ſv́nde·
die ſi an ir frúnde·
her begangē hat·