Owe· ſol aber mir iemer me·
gelúhten dvr die naht·
noch wiſſer danne ein ſne·
ir lip vil wol geſlaht·
d̾ trǒg dú ǒgen min·
ich wande es ſolde ſin·
deſ liehten manen ſchin·
Do tagt es·
Owe· ſol aber er iemer me·
den moꝛgē hie betagē·
als vns dv naht enget·
dc wir niht dvrfin klagē·
owe nv iſt es tag·
als er mit klage pflac·
do er ivngeſt bi mir lag·
Do tagte es·
Owe· ſi kuſte ane zal·
in dem ſlafe mich·
do vielen hin zetal·
ir trehene nider ſich·
ie doch getroſte ich ſie·
dc ſi ir weinen lie·
vn̄ mich alvmbe vie·
Do tagte eſ·
Owe· dc er ſo dike ſich·
bi mir erſehē hat·
als er endachte mich·
ſo wolt er ſvnder wat·
min arme ſchǒwē blos·
es wc ein wunder gros·
dc in des nie v̾dꝛoſ·
Do tagte es·