Leitliche blike vn̄ grôſliche rúwe·
hant mir dc herze vn̄ den lip nach v̾loꝛn·
min alte not die klage ich fúr núwe·
wan dc ich fúrhte der ſchimpfere zoꝛn·
ſinge aber ich dvr die dú mich froͤwet hie bevoꝛn·
ſo velſche dvr got nieman mine trúwe·
wan ich dvr ſanc bin ze der welte geboꝛn·
Menger ſpꝛichet ſeht wie d̾ ſinget·
wer ime iht leit er tete anders danne ſo·
der mac niht wiſſen was mich leides twinget·
nv tůn ab̾ ich rehte als ich tet do·
do ich in leide ſtv̊nt· do hv̊b ich ſi gar vnho·
dis iſt ein not dv́ ſangeſ mich twinget·
ſoꝛge iſt vnwert da die lúte ſint fro·
Dú mines h̾zen ein wūne vn̄ ein krone iſt·
voꝛ allē frǒwē die ich noch hā geſehen·
ſchoͤne vn̄ ſchoͤne vn̄ ſchoͤne aller ſchoͤniſt·
iſt ſi min frǒwe des mvͤs ich ir iehen·
al dv́ welt ſol ſi dvrh ir ſchoͤne flehen·
noch w̾e zit dc dv frǒwe mir loniſt·
ich han mit lobe anders toꝛheit veriehen·
Sten ich voꝛ ir vn̄ ſchowe dc wunder·
dc got mit ſchoͤne an ir lip hat getan·
ſo iſt des ſo vil dc ich ſihe da beſvnder·
dc ich vil gerne wolt iemer da ſtan·
o we ſo mv̊s ich vil trurig ſcheiden dan·
ſo kvmt ein wolken ſo truͤbes dar vnd̾· 79r
dc ich des ſchinē von ir niht enhan·