Kalte winde·
gar geswinde·
selwent heide·
grosser leiden·
kvmt vns me·
winter nahet·
vnd gahet·
vf vns balde·
vor dem walde·
dorret kle·
da von swiget manig nahtegal·
cisel schrîget·
vngefrîget·
ist sin swere·
we der mêre·
linde ist val·
Swere bv̊sse·
starke vnmv̊sse·
mv̊s ich dulden·
nah ir hvlden·
der ich bin·
svnder lachen·
mv̊s ich wachen·
nahtes sorgen·
truren morgen·
âne sin·
sit dc mir ir munt ein lachen bot·
dc erluhte·
des mich duhte·
sam div svnne
gen mir brunne·
rubin rot·
Ich gedâhte·
do mir brâhte·
froͤide ir lachen·
dc mir swachen·
solde leit·
an der svͤssen·
ǒgen gruͤssen·
sach ich dike·
in den blike·
sich versneit·
an ir ǒgen da min bester sin·
wan ich brinne
nach ir minne·
dú mich schúhet
vnd noch flúhet
swa ich bin·
Swen dú minne·
siner sinne·
gar berǒbet
der gelǒbet
dester bas·
dc mir swêre·
sv́ftebere·
lit in herzen·
minne smerzen
fuͤgent das·
wan ich die vil gv̊ten miden mv̊s·
sol ich liden·
si vermiden·
lebe ich iemer·
mir wirt niemer
sorgen bůs·
Frowe reine·
wandels eine·
svͤsse wende·
min ellende·
lieber lip·
la min werben·
niht verderben·
eteswenne·
trúwe erkenne·
selig wib·
herzen trut dv la geniessen mich·
dc div ǒgen·
svnder lǒgen·
iemer wolden·
dc si solden
sehen dich·