Froͤit úch gegen der zit·
die der svmer bringet·
schowent wie der anger lit·
wol geblůmet vnd dú heide breit·
froͤiderichen sang·
manig vogel singet·
meie hab es iemer dank·
dc er walt vnd ǒwe hat bekleit·
des ist manig herze fro·
ich lebt ǒch also·
troste mich ein selig wib·
nach der senet sich min sender lip·
Solt ich trurig stan·
ob ich si mv̊s miden·
we wie we dc getân·
vf genade stet min mv̊t vil ho·
wan sol vngemach·
mit gedulde liden·
wol mich dc ichs ie gesach·
machet si mich mit ir willen fro·
dc froͤit vf vons herzen grunt·
roͤselehter mvnt·
tů mih noh von sorge erlôst·
an ir willen lit mins herzen trost·
Trage ich hohen mv̊t·
dc kvmt von ir guͤte·
ir mvnt stet in svͤsser blůt·
sam in tǒwe ein liehtú rose rot·
ir vil truter lip·
der git hohgemvͤte·
ich gesach nie lieber wib·
noh so gůt fúr seneliche not·
swen ir gvͤte troͤsten wil·
der hat liebes vil·
da von wúnsch ich alle stunt·
dc mich kússe ir wol geroͤter mvnt·
Frowe ich weis vil wol·
was ich an dir minne·
dv bist aller selden vol·
dv bist schoͤne vnd minneklich gestalt·
dv bist valsches vri·
dv bist steter sinne·
dir wont wibes guͤte bi·
dv bist senfter sprúche vnd niht zebalt·
dv bist kv́sche zúhtig gar·
dv bist wandels bar·
dv hast alles liebes teil·
selig wib got gebe dir iemer heil·
Lieb dv liebest mir·
lieb in rehter liebe·
lieb nv la mich lieben dir·
sit dc lieb mit liebe lieber wirt·
lieb mich liebe also·
das mich leit verstiebe·
lieb so wird ich liebes fro·
wan lieb lieb in herzen liebe birt·
lieb sit dc ich liebes ger·
lieb mich liebes wer·
lieb dv bist min liebes lieb·
lieb die liebe zvket mir kein dieb·