Anglum tum gemina fulgebat lampade regnum.
Pontifices regis consulto digna gerebant,
Rex quoque praesulibus latria servibat honora.
133.0993D| Summa quies plebi legalia jura tenenti.
Frugiferis gravida gaudebant horrea glebis,
Epibatae [nautae] faciles ausu sprevere latrones.
Classica dira silent, nec formidatur egestas:
133.0994A| Promicat Ecclesia pacato foedere nexa.
Laetifer invidit, conamina mille reclusit,
Rumperet ut sanctam perverso schismate pacem.
Aggeribus crassis nisa est gens Picta rebellis,
Anglorum solitas jam tunc non ferre catenas.
Egfridus imperii largas retinebat habenas.
Conjunx alma viro Edildrid, famosa virago,
Addita conjugio vixit castissima virgo.
Princeps ergo leves animo flammante cohortes
Admovet, indomitoque reos mucrone trucidat.
Exclusere duos caesis ex hostibus amnes,
Manubiis fratri regis venere manipli,
Dant stragem late, redeunt in colla catenae:
Perfruitur magno rex victor longe triumpho.
Non armis etenim raro cum milite vicit:
133.0994B| Sed virtute Dei, meritis et praesulis almi,
Obtinuit gentes vacuo turgore minaces.