Tibia veriloquo cecinit miracula plectro:
Vis tamen innatae reticet haud mystica musae
133.0985A| Pangere magnificas athletae nobilis odas.
Moenia praefatae praesul memorabilis urbis
Christicolamque gregem septis servabat amoenis,
Francorum Dalwinus adeps: qui sicuti furvas
Pallenti lychino depellit rite tenebras.
Postquam fama volans pulsavit praesulis aures,
Accit continuo, praebens solamina justo,
Excipit hospitio, dapibus fovet oreque mulcet.
Praesensit quippe praecordia casta juventae,
Illustrisque viri faciem perfecte micantem.
Heus, inquit, hospes, mecum sis perpete sospes.
Dum juvat, uberibus pro votis utere glebis,
Farris et excreti communis copia vini.
Si vero consueta placent connubia forte,
Ne differre pares: generosi sanguinis altam
133.0985B| Immensis opibus cognatam trado puellam;
Meque patrem tibimet, temet mihi dedico prolem.
Haec placidus heros exprompserat ore jocundo.
Tiro dehinc agilis voti non immemor infit:
Ardent excoctis fibrarum omenta laternis,
Abdita conceptis dum detrahor, optime, votis.
Tethys cur tumidas Zephyro minitante salivas
Expetii? Frustra me saeva salacia pressit,
Cosmica si spreto repetam contagia Christo.
Sedis apostolicae viso primum cliothetro,
Aeria merear si longule vescier aura,
Te, pater, ex animo soboles devota videbo.
His ita compactis, opibus pro velle paratis,
Praesulis auxilio perrexit calle secundo.