Jam quia mellito dulcescit nectare guttur,
Prosequar arguta juvenem modulando cicuta.
Hic membris etenim comto glaucomate firmis,
Aequaevos habitu studuit superare venusto,
Nil puerile gerens: facundae munia linguae
Aspirante Deo gestis explebat apertis.
At perfecta virum postquam perfecerat aetas,
Natales statuit functa genitrice penates
133.0983D| Linquere et assiduis Domino famuliarier horis.
Quartum post decimum jamjam transegerat annum,
Immitis furias malens vitare novercae,
Cum sociis cessit sueta comitate decoris
Armatus properans juvenis, ceu nobile germen
Nobilium: sed operta fides umbone latebat.
Inde patris dextra pie commendatus avita,
Aulica perspicuis penetravit pergama plantis,
Insignis populi qua tempestate regebat
Dux praeclara nimis Aeonfled cognomine habenas.
133.0984B| Hujus magnificis actutum vultibus almus
Offertur multoque dehinc lepore beatur,
Acceptus cunctis fidei pollebat in actis.
Ac tum fortuitu memorandae Cudda senectae,
Vir probus ingenio, regum meritoque satelles,
Lubrica coenosi postponens gaudia saecli,
Maluit angustae certamen inire palaestrae,
Normalis sese dedans sub regimine vitae.
Is juvenem sacro suscepit amore docendum.
Exin tiro Dei fultus fervore fidei,
Ut verus Samuhel servabat jura magistri,
Fratribus aequali cunctis subjectus amore.