1. Ante secula et mundi principio
Tu, pater sancte, genuisti filium,
Qui tecum regnat cum sancto espiritu;
Novem fecisti ordines angelicos,
Deus qui iustus semper es laudabilis.
2. Aspice, deus, de supernis sedibus
Quos Theodofridus condedit versiculos
De sex aetatis et mundi principio
A protoplausto usque in novissimo.
Deus qui iustus semper es laudabilis.
3. Adam plasmatus prima aetas incipit,
Quem draco ille fraudolenter decepit
Per Evae gustum de ligno inlicito,
Et expelluntur ambo de paradiso.
Deus qui iustus semper es laudabilis.
4. Bellum crudilem inter duos geritur,
Cain occidit Abel sine gladio,
Ipse commisit primus homicidium,
Cuius origo innocentem sequitur.
Deus qui iustus semper es laudabilis.
5. Cain occisus septies requiritur
Et mors illius in Lamec ostenditur,
Qui ita dixit suis mulieribus:
Occidi virum in livore pessimo.
Deus qui iustus semper es laudabilis.
6. Ductus (est) Enoc in celis a domino
Et ambulabat cum sancto espiritu,
In paradiso cum Elia dormiens,
Et profetabunt ambo in novissimo.
Deus qui iustus semper es laudabilis.
7. Ecce intravit Noe in arca domini
Cum omne genus, quicquid terra contenit,
Deinde uxor cum noris et filiis,
Et sic finibat prima aetas seculi.
Deus qui iustus semper es laudabilis.
8. Filii Noe cum suis uxoribus
Sem,Cham et Iafeth genuerunt filios,
Qui evaserunt de magno diluvio
Et diviserunt terram in funiculo.
Deus qui iustus semper es laudabilis.
9. Genus electum, regale sacerdotium
Gentium patri Abraham ostenditur,
Qui cum domino sub arbore loquitur:
Secunda aetas finit ab exordio.
Deus qui iustus semper es laudabilis.
10. Hortus de Sarra repromissus filius,
Quem ante deus Abraham promiserat;
Ipse Rebecce iungitur coniugio,
Ex quo nascuntur gemini in utero.
Deus qui iustus semper es laudabilis.
11. Iacob a patre suo benedicitur,
Quem fratri suo Esau subripitur,
Quem ipse pater miseranter ordinat,
Ut iugum sibi de cervices auferat.
Deus qui iustus semper es laudabilis.
12. Kaus fugivit Loth cum duas filias,
Qui hospitando invenerunt gratiam.
Ex quo nascuntur gentes Moabiticae,
In quibus †verbis se carnes conglutinant.
Deus qui iustus semper es laudabilis.
13. Laudatur Iosepli propter continentiam,
Qui consentire noluit ad dominam.
Ne pullueret ipse suam animam
Nec macularet fidem, quam promiserat.
Deus qui iustus semper es laudabilis.
14. Moyses reduxit populum per heremum,
Quem rex Pharao adflixit in Egypto.
Ipse accepit legem ante domino,
Ut servaretur usque in novissimo.
Deus qui iustus semper es laudabilis.
15. Nave Iesu dux magnus efficitur,
Qui pro Helia a domino mittitur,
In cuius manus multi regis corruunt
Et sol estetit in eius solacio.
Deus qui iustus semper es laudabilis.
16. Onorem magnum David preelegitur,
Qui dum regnavit, et placuit populo
Propter Saulum, qui peccavit domino;
Tertia aetas et sic fine concluditur.
Deus qui iustus semper es laudabilis.
17. Paternam sedem Absalon preoccupans,
Per concupinas conterentur maculas;
Qui fugiendo in querquo suspenditur
Et defraudatus ab Ioab occiditur.
Deus qui iustus semper es laudabilis.
18. Quum Saedecias rex de Hierusolima
Ductus captivus venit Babilloniam,
Rex Caldeorum diripit thesauribus
De domo dei et regis palacio.
Deus qui iustus semper es laudabilis.
19. Rex captivatus adque omnes populus,
Libri cremuntur, templum et palacium;
Sic desolatur civitas ex omnibus
Et quarta aetas finit dies ultimus.
Deus qui iustus semper es laudabilis.
20. Sancta profeta et omnes captivitas
Per Zorobabel Hierusalem revocans;
Sic renovatur divina istoria
Per Estram scribam ex sua memoria.
Deus qui iustus semper es laudabilis.
21. †Tribus sĉa ludas dederat sub principem,
Erat Herodis de alia genere;
Et quinta aetas finivit in ordine,
In sexta Christus nascitur ex virgine.
Deus qui iustus semper es laudabilis.
22. Virtutem suam suscetavit Lazarum,
A muliere abstulit profluvium,
De quinque panes saciavit populum
Et loqui fecit mutos coram omnibus.
Deus qui iustus semper es laudabilis.
23. Xristus de aqua (in) Canan ad nupcias
Vinum quod fecit sic implevit hidrias;
Claudos erexit (et) cecos inluminat,
Audire fecit surdos in potenciam.
Deus qui iustus semper es laudabilis.
24. Yixus in cruce, perpenetrat ad inferos.
Tercia die surrexit ut dixerat,
Ascendit celos in magna potencia,
Cum patre regnat in eterna secula.
Deus qui iustus semper es laudabilis.
25. Zelant Iudaei et expectant alium,
Christus discendit iudicare populum;
Impii ibunt in ignem perpetuum
Et coronantur iusti ante domino.
Deus qui iustus semper es laudabilis.