Haec nunc, Christe, tuo Deus,
Conscripsi breviter munere carmina,
Constans expetiit quae studio pervigili fides.
His digesta micant simul
Coelestis patriae et militiae agmina,
Summo perpetui quae radiant aethere luminis.
Quorum te veniam prece
Indignus rogitans obsecro criminum:
Multo supplicii namque premor perpetui metu.
Trinis ecce decenniis
Vitam dego miser; quintus et insuper
121.0623D| Aevi curriculis orbis adest atque meatibus.
Me nunc nil recolens boni
121.0624A| Egisse atque pii, concutior nimis;
Curae nam stimulant horribiles mentis ad intima.
Lapsum jam releva, Pater,
Tandem et praeteritis exue sordibus,
Squalet conscia quis mens, nimiisque angoribus tremit.
Sanctorum retuli canens
Hic certamina, praeclaraque martyrum
Vexilla ante oculos constitui, signaque ovantium.
Horum glorificat, Pater,
Sanguis te, jugiter mors loquitur pia:
Vivunt namque tuo praesidio et luce perenniter.