Vides, ut altum fluminis otium
Rerum quieta ludit imagine,
Solemque lunamque et sereno
Picta refert simulacra coelo.
Talem severae lege modestiae
Compone mentem: seu caput horridis
Fortuna circumsultat undis,
Seu placida tibi mulcet aura.
Innube semper rideat aureo
Pectus sereno: quo melius sacros
Deique naturaeque vultus
Non dubiis imitetur umbris.
Pulchrum est, quieta mente volatili
Instare vero, nec trepido gradu
Urgere naturam, nec inter
Ambiguas fluitare caussas:
Sed mente fixa ducere liquidos
Rerum colores, et capitis sacra
Ab arce prospectare verum, et
Fixa suis sua rebus ora.
Frustra protervis fraena damus feris,
Si nulla nostrae fraena proterviae
Aptamus. Excussere coelo
Non vacui Phaethonta fraeno,
Sed lege, currus. Qui refugit, sui
Rex esse, regni nesciet exteri:
Quicumque dat sibi, regendo
Ille potest dare ju ra mundo.
Ut mentis almo cuncta premas sinu.
Ipsum severis te preme legibus:
Sic tu probis solers minister
Consiliis, ego fidus auctor.