Quid diu vanas feriente nubes
Vota fallaci jaculamur arcu?
Quid loquor dudum mibi consul ipse,
Ipse senatus?
Ite, mordaces, procul ite, curae;
Me vocat notis Helicon viretis,
Me sacrum lauri nemus, et canorum
Phocidos antrum.
O ubi molles Heliconis umbrae!
O ubi Cydnus, violisque pictum
Thespiae rupis caput! o sonori
Flumina Pindi!
Me quis ad vestros Aquilo recessus,
Aut quis alata Zephyrus quadriga
Deferat fessum, gelidosque Cirrhae
Sistat ad amnes?
Vos mihi Romam, Phrygiisque centum
Pendulas saxis simulatis aedes:
Vos Aventinum Capitoliique im-
mobile saxum.
Hic ubi laevi cecidere musco
Virgines undae, vitreoque garrit
Ore Clitumnus, nimiumque labi
Sedulus Almon:
Hippocreneis abiere rivis
Pegasi fontes, Aganippidumque
Murmur et cantus et euntis agro
Copia lymphae.
Alter hic Liris fugit, alter Ufens:
Alter illimi Thrasimenus amne
Trudit electrum, liquidoque Plaeve
Volvitur auro.
Hic ad Empusae nemus, et virentem
Aesaris ripam studiosa florum
Aura colludens cumulo jocantis
Obstrepit undae.
Lenis hic aurae tepor, hic venustas:
Hic nitor rerum, meliorque coeli
Vultus: hic plenis agitata manant
Gaudia ripis.
Hic sales compti, facilesque risus,
Hic levis circum jocus, et decentes
Gratiae plenos referunt resecto
Flore quasillos.
Hic mihi septem melius renident
Romuli colles, gracilesque venti
Lenius perflant gelidam supini
Tiburis arcem.
Collis o sacri decus! o magistrum
Numen! o Grajae fidicen Camoenae,
Phoebe, si gestis procul arduo des-
cendere Cyntho,
Huc ades, longi mihi testis oti.
Tuque (nam me quis prohibet?) reposta
Atfer in primis mihi, Fusce, grati
Carmina Flacci.