Pulchro, Quirites, pulvere gaudeat
Impubis aetas, et strepitum, et minas
Jam nunc, et audaces tumultus
De tenero meditetur ungui:
Visoque primum sanguine gestiat
Inter cadentum signa: neque eligat
Quo lassa post pugnam reclinet
Colla toro; solidisque somnum
Commendet armis: aut clypeo super
Effusus, aut se cespitis explicet
Per summa, non parcus juventae,
Et decorum pretiosus emptor.
Hoc septus olim milite, Bistonum
Vallata saxo diruit oppida
Regnator Epiri, et timendus
Parrhasiae moderator orae.
Heu, quantus armis, quantus adest equis,
Quantusque sudor depopulantibus
Pangaea Dacis! cum refusi
Ferrea diluvies Gradivi
Tumultuosi turbine proelii
Concussit Haemum: cum Rhodopen prope,
Sacrisque Ladislaus armis
Attonitum patefecit Hebrum,
Et bellicosum Strymona vindice
Turbavit hasta, qui calidas adhuc
Strages Gelonorum, et natantum
Scuta virum, galeasque volvit.
Magnum illa terris intulerat metum,
Praeceps alienas rumpere copias,
Taboque fumantes et igni
Ausa cohors operire campos.
Si non, honesti laeta periculi,
Bellique metas rumpere pertinax,
Egisset armorum cupido
Non humiles iterare pugnas:
Manes avorum quis bene prosperis
Excuset armis? quae manus impigrum
Leti Musurmannum paternis
Immolet, inferias sepulcris:
Quae nunc (pudendum!) illudere pervicax
Persultat armentum: et miserabiles
Delent peremptorum ruinas
Hinnulei timidaeque damae?
Eheu! cicatricum Hesperiam pudet,
Et mollis oti, et turpis inertiae,
Iraeque, quae procudit arma
Immeritis inimica regnis.
Quisquamne tandem (dicite, posteri)
Ulturus Urbis nomen et imperi
Affulget ensis? atque ab ullo
Scuta tholo galeasque pendent?
An (quod vereri crediderim nefas)
Futurus ensis Dardanios adhuc
Proscindit agros, aut Latina
Arva metit, vifidesque silvis
Frondent sagittae? Non ego Romnlam
Damnabo pubem, veridicus sacri
Vates Gradivi. Jam cruento
Sparsa mari fluitare tela
Videre, totis jam videor Thetin
Pugnare remis; jam Latiae procul
Turmae, repercussaque circum
Aera micant galeaeque lympha.
Jam plana Triton personat aequora
Clangente cornu. Jam video novas
Late per Aegeum moveri
Cycladas, Aemoniamque longe
Inauspicato sidere lugubrem
Moerere lunam: jam profugae retro-
cedunt tyrannorum phalanges,
Paene metu glaciante pontum.