Urbane regum maxime, maxime
Urbane vatum, Pegaseus Tibi
Temo, volaturusque late
Regna super populosque currus
Jam dudum apud me est. Eripe Te solo
Obliviosis eripe nubibus
Nomenque laudesque. O Deorum
Concilio, patrioque quondam
Promisse coelo! Te super inclyta
Terrarum et altas Acroceraunia
Egressa nubes, Te superni
Colla super humerosque Pindi
Attollere alte, non sine numine,
Luctabor. Ibis, sub pedibus pigras
Urbes relicturusque gentes,
Attonitae novus bospes aurae,
Hac unde vasti littora Nerei,
Amnesque, camposque, et ju g a desuper
Arcesque mirari, et natantes
Oceano numerare terras
Coram licebit. Jam Tibi barbarus
Circum supinis collibus annuit
Haemus, salutataque longe
Attremit Acrocorinthus aula.
Ter pronus Othrys, ter trepidae latus
Subsedit Ossae, ter Rhodope nives,
Sacrasque submisere lauros
Emathii capita alta Pindi,
Sacerque Phoebo Cynthus, et aviae
Acuta Cyrrhae. Laurigeris Tibi
Thyrsis coronatus Cithaeron,
Et patula nemorosa pinu
Pangaea gaudent brachia frondium
Longe tetendisse, et procul obvios
Currus adorare, et volanti
Ardua supposuisse terga.
Hinc ire pompas, hinc Tibi praepetes
Centum superbis ire curulibus,
Urbane, Musas, atque aperto
Ire sines tua facta coelo.
Auditis? an me ludit amabilis
Imago pompae? Jam videor pios
Audire plausus, et frementes
Caeruleum per inaue turmas.
Hinc et tepenti vectus ab Africo
Apum sonoro exercitus agmine
Leni ter Urbanum susurro,
Ter resonis fremuere pennis.
Ter vecta terris ac pelago super
Respondit Eclio: ter lituis procul,
Sparsae ter Urbanum Camoenae
Pindaricis cecinere plectris.
Audivit ingens Pontus et insulas
Erexit omnes: ilicet Africae
Plausere et Europes, et una
Americes Asiaeque regna.
Laetaeque tandem, Currite saecula,
Dixere Musae: currite candidis
Horae quadrigis; ite, magni
Saecula deproperate Menses.
Dixere Musae: protinus aurea
Risere longum saecula, saecula
Auro laborata et recuso
In pretium emicuere vultu.