Mytilena <ego> ortus Pittacus sum Lesbius,
gignoske kairon qui docui sententiam.
sed iste kairos, tempus ut noris, monet
et esse kairon, tempestivum quod vocant.
Romana sic est vox «veni in tempore ».
Vester quoque <Afer> comicus Terentius
rerum omnium esse primum tempus autumat,
ad Antiphilam quom venerat servus Dromo
nullo inpeditam, temporis servans vicem.
Reputate cuncti, quotiens offensam incidat,
spectata cui non fuerit opportunitas.
Tempus me abire, molestus ne sim: plaudite.