Personae:
Observator, Capparonus.
O.
Unde venis, Capparone?
C.
Domo.
O.
Quid affers illinc?
C.
Merendam.
O.
Quis tibi permiserat exire?
C.
Praeceptor ipse.
O.
Unde istud probabis?
C.
Adeamus illum ut consulamus.
O.
At vide quid agas.
C.
Hac in re nihil timeo.
O.
Adeone securus es?
C.
‘Qui verum dicit, nihil timere debet.’
O.
Vera quidem ista est sententia, sed quotusquisque non mentitur?
C.
Certus sum me nihil mentiri nunc.
O.
Propemodum persuades mihi. Abi: credo tibi, quia in mendacio nunquam te deprehendi.
C.
Est Deo gratia: quem precor ut me integrum et purum custodiat.
O.
Utinam ex animo omnes precarentur. Recipe nunc te, ut edas merendam tuam.