Personae:
Augustinus, Rodigus.
A.
Quis iste novus liber deauratus, quem tam magnifice ostentas?
R.
Terentius.
A.
Ubi impressus?
R.
Lutetiae.
A.
Quis tibi dedit eum?
R.
Emi pecunia mea.
A.
Unde nactus eras pecuniam?
R.
Stulte, istud quaeris? quasi vero furatus sim?
A.
Absit a me id cogitare: sed animi causa id rogabam.
R.
Nec ego serio dictum tuum reprehendi: sed eo more iocari solemus cum familiaribus.
A.
Nihil iocari prohibet, modo ne Deus offendatur. Sed age, ad propositum revertamur: de quo emisti Terentium istum?
R.
De Clemente.
A.
Illone bibliopola circumforaneo?
R.
Maxime.
A.
Quanti constitit?
R.
Decem assibus.
A.
Nihilne amplius?
R.
Nihil omnino.
A.
Profecto fatis vile pretium.
R.
Praesertim cum auratus, adeoque eleganter compactus sit.
A.
Erantne codices alii similes?
R.
Duo vel tres.
A.
Deduc me quaeso ad illum.
R.
Eamus.