Personae:
Damon, Audax.
D.
Visne mihi describere praelectionem?
A.
Cur non habes?
D.
Quia hesterno die fui occupatus.
A.
Accipe librum meum, et describe.
D.
Non ignoras me lentius scribere: et tu citius totum descripseris, quam ego quatuor aut quinque versiculos.
A.
Quaere tibi alium scriptorem; nunc ego tibi non possum dare operam.
D.
Cur non?
A.
Est mihi aliud negotium, idemque pernecessarium.
D.
Nolo te urgere, nec possum quidem: sed saltem commoda tuum codicem.
A.
Accipe; utere ut libet, modo ne abutare. Nihil est quod hic verearis.