Clara refulgent hujus templi culmina
Perfusa luce septiformis Spiritus,
Christi rubescunt purpurata sanguine
(0497B)Perlitatore pretiosi balsami
5Odore fragrant mistis aromatibus.
Sint semper istam supra domum, Domine,
Tui aperti, deprecamur, oculi:
Auresque tuae sint intentae jugiter
Diem per omnem, noctis et in tempore:
10Tuoque semper ore benedicto.
Sint angelorum hic alba frequentia,
Descendat omnis huc coelestis gratia,
Diffusa sancto largiente Spiritu.
Vultu sereno sancta semper Trinitas
15Pio favore dignetur inspicere.
Nubes sacrata, quae pendens incubuit
Deo jubente supra tabernaculi
Tectum, beatus quod Moyses in eremo
(0497C)Fixit, precamur hujus aulae moenia
20 (0498A)Afflata sancto perfundat Spiramine.
Famosa dudum quae replevit atria
Templi dicati nebula perlucida
Orante puro Salomone pectore,
Hanc Christe coeli missa de cacumine
25Domum fecundes sempiterno munere.
Quicunque tuum sanctum nomen supplici
Plenoque corde deprecatus fuerit,
Hujus in aedis sancto domicilio
Te largiente sit liber a crimine;
30Exclude pestem, morbos omnes dilue.
Tuo sacrato hic depasti corpore,
Tuoque sancto satiati sanguine,
Ab hoste tuo defensi munimine,
Laeti fideles sortiantur servuli
35 (0498B)Vitae perennis sine fine gaudia.
Rerum Creator Jesu Patris unice,
Mundum cruore salvas qui purpureo,
Peccata tollis solus qui pestifera,
Dignare tuos munere gratuito
40Ad astra coeli mittere ruricolas.
Sit semper alta Deo Patri gloria,
Omnis potestas sit dilecto Filio,
Sanctoque semper gloria Paraclito,
Honorque, virtus, laus, decus, imperium
45Et nunc et ultra sit per cuncta saecula.
Amen.