Sex gradibus consummatur perfectio casta:
Primum dum vigilas fluxum nescire petulcum;
Quem sequitur, lasciva diu non volvere corde;
Tum ne vel leviter speciem cernendo cupiscas;
Quartus erit nec simpliciter genitale moveri,
[0350A]Quintus ob auditum veneris nil mente vagari;
Ultimus, in somnis nullo phantasmate ludi:
Hoc sibi nemo rapit, sed Christi gratia praestat,
Est servanda tamen diuturna medela diaetae,
Libra cibi solidi, simplex hemina falerni;
Praeterea labor, excubiae, rogatio crebra,
Ne caro languentem necet incrassata pudorem.
Castus agit, quem nulla libido movet vigilantem,
Nec violare potest sopitum illusio foeda.