Hic, qui supinos defluentibus plumis
Investit armos, et bicorporis plantae
Effultus ungue rectus imminet coelo,
Et letiformi Marte proeliaturus
Explorat ensem providus duellator.
Non Atticarum flexili chorearum
Proludit orbe, non rotatili plausu
Reciprocante verberat solum planta:
Cuniculosis non Amazonum silvis
Inhospitales Arcton appulit gressus:
Sed e tropaeis laetus Imperatorum
Chodkevicanas transmigravit in ceras,
Suisque clarum stemma laudibus fulsit.
Nunc ad Poloni Martis aereos cantus,
Tubaeque gratum murmur exsoporatus,
Formidolosos ense fulminat Tureas.
Avertat isthinc pervicax Hetruscorum
Et Apulorum veritas sacerdotum
Victoriarum nuntias coturnices,
Vates columbos, auguresque cornices.
En, certiora, magne militum ductor,
Gryps Lechicorum signa dat triumphorum:
Ut, dum per auras fluctuante subsultu
Stat ludibundus, et velut theatrali
Pugil bipenne motat area ferrum,
Spectator ipse nesciat, tuum Grypha
An proeliantem cernat, an triumphantem.